Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 24 - Abril 2019

Apúntate al nuestru boletín

Artes Escéniques

Teatru «escenAvilés xunetu/agostu 2018»

La calidá de la programación teatral veraniega vien respaldada pol sellu de la crítica y del públicu

Na edición xunetu/agostu d'escenAvilés hai una presencia estraordinaria d'un teatru de referencia, el Colón de bogotá, que, xunto con La Compañía Estable, produz un Macbeth llaráu d'alusiones a la Colombia d'anguaño. Preséntase como espectáculu estrella n'Almagro y vien p'Avilés como única actuación n'España fuera del Festival, añadiendo un títulu nuevu a la programación de teatru internacional del Niemeyer.

Tamién n'otra llista, la de los estrenos absolutos, incorpórase Lehman Trilogy, el musical sobre la obra de Stefano Massini (sucesor de Luca Ronconi al frente del Piccolo milanés)qu'un creador mui conocíu y valoráu pol públicu de casa, Sergio Peris-Mencheta, escoyó como una crónica demoledora del nuestru tiempu, pa plantegar una reflexón sobre la maquinaria del capitalismu global, xenerador de la especulación financiera y responsable de la última gran crisis mundial.

L'abonu del nuevu ciclu complétase con otres dos representaciones de calter mui diferente: la primera, Miguel de Molina al desnudo, ye la recuperación de la tremenda personalidá d'un artista mui popular con una llibertá creadora y personal que foi por desgracia víctima de los cánones morales represivos del tiempu nel que-y tocó vivir. Con esta interpretación rellumante d'Ángel Ruíz, algamó'l premiu como Meyor Actor Protagonista nos Premios Max, Unión d'Actores y Teatru Musical.  

Pieslla'l ciclu d'abonu una cuarta representación a cargu de Denise Despeyroux que, tres del so repetíu pasu pel off del Niemeyer, xúbese agora al teatru Palacio Valdés cola so obra última y bien aclamada, Un tercer lugar, onde se xunten y s'acolumbren les peculiaridaes del so estilu personal, col so humor, a vegaes desconcertante, dexando siempre pasu a sentimientos con daqué tresfondu d'estrañeza.

Pero esta escenAvilés veraniega presenta tamién una novedá: incorpora per aciu de la programación Platea dos títulos fuera d'abonu con grandes intérpretes como cabezaleros y cabezaleres de cartel: Carmelo Gómez y Ana Torrent nun testu d'Alberto Conejero, qu'entá ye un rapaz y con munchu renome (Todas las noches de un día) y Concha Velasco y Antonio Resines nuna comedia folixera de Manuel M. Velasco (El funeral).

Programa

Teatru Palacio Valdés

Día 7 de xunetu, vienres, 21:00 h

Todas las noches de un día, d'Alberto Conejero

Versión: Alberto Conejero

Compañía Nacional Moza de Teatru Clásicu

Direición: Luis Luque

Repartu: Carmelo Gómez y Ana Torrent

Un misteriosu apraderu por descubrir provoca esti intensu xuegu de muncha fuerza dramática onde xurden el carácter y el destín de dos personaxes nuna historia llarada de misterios ensin resolver.

Función fuera d'abonu. Programación Platea

Auditoriu Centru Niemeyer

Día 23 de xunetu, llunes, 21:00 h

Macbeth, de William Shakespeare

Traducción y adautación: Joe Broderick

Dirección: Pedro Salazar

Repartu: Christian Ballesteros, Diana Alfonso, Diego León Hoyos, Felipe Botero, Iván Carvajal, Andrés Estrada y otros.

Gran producción (15 intérpretes) del míticu Teatru Colón de Bogotá y la Compañía Estable pa un clásicu universal presentáu nun ambiente tresgresor de referencies oblicues a la colombia d'anguaño.

Teatru Palacio Valdés

Día 27 de xunetu, vienres, 21:00 h

El funeral

Autoría y direición: Manuel M. Velasco

Repartu:  Concha Velasco, Antonio Resines, Cristina Abad, Clara Alvarado y Emmanuel Medina.

La pantasma de l'actriz más importante de cine, teatru y televisión apaez nel so propiu funeral pa, metanes de tol desconciertu xeneral, solucionar asuntos pendientes, lo mesmo profesionales como personales.

Función fuera d'abonu. Programación Platea

Auditoriu Centru Niemeyer

Día 4 d'agostu, sábadu, 21:00 h

Miguel de Molina al desnudo, d'Ángel Ruiz

Direición: Félix Estaire

Direición musical: César Belda

Repartu: Ángel Ruiz y César Belda (pianu)

La figura arrolladora de Miguel de Molina (tan maltratada pola España escura de la posguerra) nuna reivindicación d'esta dramaturxa sólida y equilibrada con una interpretación que requier un actor-cantante esceicional.

Teatru Palacio Valdés

Día 17 d'agostu, vienres, 21:00 h

Lehman trilogy, de Stefano Massini

Adautación y direición: Sergio Peris-Mancheta

Direición: Pedro Salazar

Repartu: Víctor Clavijo, Pepe Lorente, Darío Paso, Aitor Beltrán, Leo Rivera y Litus.

Seis actores-músicos encarnen esti espectáculu de teatru musical sobre la dinastía de los Lehman, esponentes del mitu fundacional del capitalismu y la so deriva hacia la crisis económica, ética y social.

¡¡¡Estrenu absolutu!!!

Teatru Palacio Valdés

Día 24 d'agostu, vienres, 21:00 h

Un tercer lugar

Autoría y direición: Denise Despeyroux

Repartu: Íñigo Rodríguez-Claro, Vanessa Rasero, Giovanni Bosso, Sara Torres, Pietro Olivera y Denise Despeyroux.

Seis personaxes rellacionándose lo meyor que pueden y tratando de querese lo meyor que saben componenesta pieza, merecedora d'una d eles meyores reconocencies por aprte de la crítica esta temporada.

  • © 2019 Fundación de Cultura. Conceyu d’Avilés. | Avisu llegal |