Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 24 - Abril 2019

Apúntate al nuestru boletín

Esposiciones

Esposición «Vida», de Fernanda Álvarez, Dora Ferrero-Melgar y Chenky Rodríguez

Centru Municipal d'Arte y Esposiciones (CMAE). Dende'l 16 de xineru hasta'l 3 de marzu de 2019

Les Ayudes a la Producción Artística, que la Conceyalía de Cultura d'Avilés ufre dende la Fundación Municipal de Cultura y la Factoría cultural, son importantes pa que creadores de disciplines diferentes puedan desenvolver el so trabayu n'Avilés.

Na convocatoria de 2017 dióse-y el premiu d'Artes Gráfiques al proyeutu VIDA, que s'asoleya la primer vez nuna esposición nel CMAE, obra de les artistes Fernanda Álvarez, Dora Ferrero-Melgar y Chenky Rodríguez.

VIDA ye un trabayu coleutivu desarrolláu en dellos soportes gráficos diferentes, que va afondando nel pasu'l tiempu, nuna reflexón sobre la esistencia, el medrar y la edá seronda. Les creadores investigaron d'una forma individual na forma d'espresión y punxéronlo too en comuña, per aciu del diálogu continuu. Asina, el so puntu de vista camuda nuna visión poliédrica.

El proyeutu ñació tres la edición conxunta d'un llibru d'artista y d'una carpeta d'obra gráfica na que cada una volcó los sos conocimientos d'estampación. Dempués d'eso, evolucionó, incorporando nueves téuniques, ente elles la cerámica, cola que pudieron esperimentar na Factoría Cultural, construyendo asina una obra multidisciplinar.

Fernanda Álvarez enfréntase a les alcordances y suaños de cuando yera neña. Presenta los sos autorretratos que yáson bien conocíos en forma de silla y puxa pola seriación pa tresmitrir conceutos como'l pasu'l tiempu, avieyar. Con trames en moaré, asoleya l'alloriu que la arrodia.

Dora Ferrero-Melgar insiste nel conceutu del tiempu dende la nacencia, representáu polos güevos de porcelana, que son l'orixe. Dende ehí produzse una tresformación, los cuerpos muten, y refléxase en pieces con papeles encolaos mui especiales, cachos que se suelten del cuerpu, como metáfora del pasu'l tiempu.

Chenky Rodríguez aporta, amás de llitografíes, y téuniques fotográfiques como rayogrames y cianotipies, una riestra vidios colos que da a entender la so manera d¡'entender la vida, como un camín constante llaráu de pilancos, nel que de xemes en cuando acolúmbrase la guapura.

Más información

Centru Municipal d'Arte y Esposiciones (CMAE)

C/ Llano Ponte, 49

33402 Avilés. Asturies

T: 985 129 004

Martes a domingu • 18:00 a 21:00 h

Entrada de baldre

  • © 2019 Fundación de Cultura. Conceyu d’Avilés. | Avisu llegal |