Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 26 - Ochobre 2019

Apúntate al nuestru boletín

Esposiciones

Esposición «Negación», de Jaime Rodríguez

Centru Municipal d'Arte y Esposiciones (CMAE). Dende'l 18 de xunetu hasta'l 31 d'agostu de 2019

El Centru Municipal d'Arte y Esposiciones, acueye la esposición Negación, una amuesa del últimu trabayu del artista uvieín Jaime Rodríguez.

Negación recueye'l talentu que tien l'artista pa varies disciplines, en soportes que van dende'l videu al collage, pero tamién el dibuxu, el retratu, el fotomontaxe o tamién el bordáu. Un caos n'apariencia propiu de la so personalidá , qu'escuende un universu perfeutamente estructuráu, con rellatos imaxinaos con conteníu, y con una carga de crítica social. Y, sobre too, munchu posu de la so vida y del camín fechu.

En pallabres del mesmu autor, «trátase d'una esposición abondo autobiográfica en xeneral, porque reflexa'l mio cambiu personal y cómo tuvi que dir espresando'l "non" en munchos aspeutos de la vida, y nos momentos que me tocaron vivir».  

La flexibilidá ye la guía del talentu creativu de Jaime rodríguez, que ye quien a desenvolver cualqueir disciplina que lu dexe espresase con llibertá, mientre que se dexe llevar por una imaxen, un oxetu o una historia que-y pide la so intervención o reinterpretación.

Nun ye la primer vez que se pue ver la so obra nel CMAE. Espuso en 2015 n'amuesa coleutiva Process; en 2016, al mesmu tiempu con Otty Pérez Laspra n'Abismos, y en 2017 con Activa.

Jaime Rodríguez ñació n'Uviéu en 1968, y ye ún de los artistes asturianos que más puxa pol arte contemporáneu, con munchu camín andáu, camín qu'entamó en 1993. Trátase d'un artista tresdisciplinar, que coordinó  y comisarió esposiciones n'instituciones públiques y privaes. Tien formación abondo : Máster d'Arte Actual, Análisis y Xestión na Universidá de Barcelona, Graduáu n'Artes Plástiques y Diseñu na Escuela d'Arte d'Uviéu, y Llicenciáu en Xeografía y Historia y doctor n'Historia l'Arte pola Universidá d'Uviéu. Ye'l creador de la edición esperimental o revista ensamblada SINEDIE, tamién del certamen internacional de sound-videuArt ACTIVA y ye presidente de l'Asociación Artístico Cultural MARBAS. Tamién artista performativu, espuso él solu y tamién n'amueses coleutives dende Canadá hasta París, dende Málaga hasta Burgos. La so obra pue atopase en dellos museos, instituciones y coleiciones privaes.

Más información

Centru Municipal d'Arte y Esposiciones (CMAE)

C/ Llano Ponte, 49

33402 Avilés. Asturies

T: 985 129 004

Martes a domingu 18:00 a 21:00 h

Entrada de baldre hasta completar aforu

  • © 2019 Fundación de Cultura. Conceyu d’Avilés. | Avisu llegal |