Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2021 -Númberu 31 - Xineru 2021

Apúntate al nuestru boletín

Esposiciones

Esposiciones «V Esposición Internacional d'Arte Postal n'Avilés: tierra»

Palaciu de Valdecarzana, 18 de avientu de 2020 a 15 de xineru de 2021

La V Esposición Internacional d'Arte Postal n'Avilés afita a la ciudá asturiana como referente del Mail Art na Península, como pue vese coles 500 obres que llegaron, más que n'otres ediciones. Una iniciativa patrocinada pol Conceyu d'Avilés na que collabora CORREOS, per un llau faciendo d'intermediariu pa que les 500 obres postales mandaes pudieren llegar a Avilés dende 37 países y estaos diferentes que pueden vese nel Palaciu de Valdecarzana, sede la convocatoria.

Emilio Carrasco Gutiérrez (México)Per otru llau, y como novedá nesta edición, esta collaboración materializóse na emisión d'un sellu oficial dedicáu al Arte Postal con una obra escoyida d'ente les demás recibíes y que Filatelia CORREOS va poner en circulación na prósima edición en 2021, puxando enforma pol arte per corréu.

Que seya la primer vez que l'Arte Postal tenga un sellu específicu circulando dende Avilés, redundará nun mayor espardimientu d'esti movimientu creativu, billateral, llibre y suxerente, alrodiu d'un motivu común, que ye dafechu una forma d'espresión pel que viaxen  diferentes obres postales dende y pa cualquier sitiu del mundu, reblagando fronteres territoriales y de tou tipu, dando sentíu al conceutu más sinceru de comunicación, y que ta al algame de cualquier persona que sienta la necesidá de tar dientro l'universu del arte per corréu. Poro, hai de valorar muncho la collaboración de Filatelia CORREOS pa col proyeutu avilesín, y sobre too col  Mail Art, siendo esti sellu nuevu dedicáu al Arte Postal un puxu pa esta corriente artística, asina como'l meyor embaxador de l'actividá cultural que se programa n'Avilés y una nueva obra d'arte pequeña que s'incorpora a la filatelia española. 

Diana Kroshilova (Rusia)En piesllando la esposición, munches d'estes obres espuestes n'Avilés, van siguir enseñándose nel Muséu Postal y Telegráficu que CORREOS tien en Madrid, allugando nes sos instalaciones la primer vez al Mail Art con esta representación pa que'l públicu visitante los disfrute, col envís de llevar la esposición per varies oficines principales de CORREOS del territoriu nacional.

Escuela de Cerámica Alfar Arias (España)Tres del fueu (2018) y l'agua (2019), ye la tierra'l motor de la V Esposición Internacional d'Arte Postal n'Avilés, empobinándose con ello a completar los cuatro elementos fundamentales na formación de la vida, col aire como oxetu d'inspiración na siguiente convocatoria. Asina entós, el conceutu «tierra»,más p'allá de la pura materia xeolóxica, ye la esencia de la que brotó'l procesu creativu de la comunidá de mailartistes que participaron na convocatoria y que dexaron reflexáu nes sos postales, idees y oxetivos bien diferentes.

Tierra o barru, materia imprescindible pa que xurda'l cacíu como arte de maxa de les manes arteres del alfareru. Tierra, l'últimu cobertor del enterráu. La Tierra, planeta o mundu nel que Mafalda ta enfotada en sanar con tirites untaes n'inocencia, resistiéndose a mandar que lu paren pa baxase d'él, convidándonos col so xestu tiernu y ensin picardía pa que caún de nós actuemos yá y pongamos la nuestra propia tirita pa cuidar del planeta si nun queremos desapaecer como especie. Terra patria, o tierra de los padres onde enterrar a los antepasaos, dafechu la patria o la tierra onde ún ñació y onde quier morrer, o onde'l nómada s'atopa bien y que por eso la quier, fenómenu descritu mui bien por Ramón Muntaner na so crónica del sieglu XIV: lo normal ye que cualquier persona, lo mesmo qu'un páxaru o que cualquier criatura, quiera a la patria y al sitiu onde ñació.

CAI Villalegre (España)Ye sitiu pal que se vuelve en terminando'l camín de la vida pa buscar el reposu nel sitiu dende'l que se salió; o cuando la vida ta escontra del qu'anda d'un sitiu pa otru y ta obligáu a repatriase, como-y pasa al bonu de Sancho Panza na obra más importante de Miguel de Cervantes: Abre los güeyos, naguada patria, y mira que torna a ti Sancho Panza'l to fíu, a lo meyor non mui ricu, sinón, mui mui machacáu. Fúxese de la patria o la patria échate cuando la maldá humana ye intolerable, condenáu'l esterráu a arrastrar la so pena y el so desconsuelu per tierres ayenes y el polvu del camín ye'l únicu sitiu onde abellugase.

Corporación Semiótica Galega (España)Xea, la Madre Tierra, una de les primeres dioses, madre d'Océanu (dios mayor de les agües del mundu), y de Ceo (dios de la intelixencia), d'Hiperión (dios de la Lluz y padre d'Helios, el Sol), de los cíclopes (xigantes que sólo tienen un güeyu, facedores de muralles), de les muses (dioses de la inspiración artístiques) y de les titánides..., diosa suprema onde tán toles esplicaciones. Suelu, prau, tarrén, cachu tierra convertíu en prau fértil pa semar edificios d'hormigón, llaráu de xente y contaminación ambiental, escontra'l páramu ermu y abandonáu, vaciáu, nel que sólo hai aire xuxuriando'l so llamentu atristayáu y desesperación por culpa la soledá.

Orbe, Tierra Santa, tierra prometío, destín de pelegrinos viaxeros impenitentes sucesores del Apóstol pelegrín o d'Exeria (figura viaxera protagonista en sellos españoles). ¡Tierra a la vista!, glayao pol vixilante dende la cofa (cestu que ta no más alto del palu mayor de dellos barcos y orixen de munches espresiones como O carrallo da vela, na vecina Galicia). Tierra conquistao, tierra quemao, tierra firme onde'l pie atopa un apoyu y xurde de de la dulda de la suspensión arbitraria de la suerte.

Gloria Keh (Singapur)Cientos de mailartistes fueron quien a sacar lo que d'espiritual pueda contener l'alama de la tierra material y de la tierra metafórica, y los resultaos llaren les paredes del Palaciu de Valdecarzana onde s'amuesa la V Esposición Internacional d'Arte Postal n'Avilés, asoleyando otras vegada más l'espíritu solidariu y altruista que carauteriza al mailartista y que ta dientro de la filosofía del Mail Art universal. Son munches les postales que faen un brinde pa entrar en paisaxes idílicos, paradisíacos, esóticos, o que muestren horizontes pa perdese y suañar; pero son más les que denuncien el deterioru ecolóxicu del nuestru planeta.

Dende la rapaza ecuatoriana Dalexis Triana que dibuxa una tierra llorando de pena por culpa de tanta basura y contaminación, a la d'un reló de tierra que nos apura pa qu'intervengamos pa parar el desfaimientu de los ecosistemes, mandáu pola corporación Semiótica Galega (COSEGA); o la tarxeta del alemán Lorenz Mueller qu'apura pa qu'haya un entendimientu ente la humanidá y el planeta; o tierra de verdá de Perú, embolsada por Víctor Valqui; o corteces de maleluca (árbol del té) matasellaes  y mandaes dende Brasil por Helga Correa, un país que sufre la deforestación del bosque amazónicu como destaca la creativa brasileña Tuannhy Rozeira nel so collage Amazônia, un tesouro ameaçado,son, como toles demás, creaciones que ponen l'acentu no que tien de tierra la convocatoria.



Bases

Español


 

Asturianu


Galego


Deustsche

Calendariu d’eventos

anterior Marzu 2021 siguiente
ll ma mi xu vi do
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

Axenda

  • 02/03/2021
  • 08/03/2021
  • 09/03/2021
  • 18/03/2021
  • 26/03/2021
Espacio Atlántico - Programa TransnacionalInnovate - Promoting Economic ChangeUnión Europea - Fondo Europeo de Desarrollo Regional
  • © 2021 Fundación de Cultura. Conceyu d’Avilés. | Avisu llegal |