Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 24 - Abril 2019

Apúntate al nuestru boletín

Xueves, 14 de Febreru de 2019

Esposiciones

Esposición «Formas con textura», cerámiques de Carlos Cabo

Palaciu de Valdecarzana. Dende'l 14 hasta'l 28 de febreru de 2019

14/02/2019

La materia formula, nel sentíu más fondu, lo que nos arrodia. Sabémoslo y intuísmolo. Ta na base de los nuestros espacios y de los nuestros tiempos. Sal d'ella y vuelve pa ella. La materia y les sos formes nun pueden separtase de la nuestra perceición y de la nuestra sensibilidá, porque la esperiencia que tenemos del mundu ta amarrada a ella. 


A lo qu'asoleya
A lo qu'escuende. 
A lo que diz y a lo que tovía calla.

Significaos y significantes que nós mesmos fuimos faciendo y desfaciendo, sólo pa volver a facer, viven na materia y les formes. Unes y otres embárquennos na necesidá de buscar la guapura. Y atopar coses clares. La vida de la materia, la historia les formes, empobina la nuestra mirada pelos sos requexos pa envolvenos na reflexón astrauta de perdenos nes sos testures.

Nesta cenciellez, tan fonda y trescendente, la qu'atopamos nel noyu de l'actividá creativa de Carlos Cabo. Ye la enerxía que tien les sos obres y que nos cañica pente elles. D'enantes y ritual, pasada y presente. Íntima y universal. La natura, la xeometría, l'espaciu ocupáu y el vacíu tán dientro del so universu táctil y visual. Que nos arrampla y fai un brinde pa volver a él, que nos dexa colingando na so calma, nel so silenciu y na verdá d'un viaxe estéticu de matices infinitos y de sensibilidá escomanada.  

Ana González

Polípticu de la esposición

500 años del ñacimientu de Pedro Menéndez d'Avilés

Diferentes sitios d'Avilés

14/02/2019 al 15/02/2019

El vienres 15 de febreru cúmplense 500 años del nacimientu de Pedro Menéndez d'Avilés, y por eso, la ciudá va facer diferentes actos d'homenaxe y actividaes, ente les que destaca la visita del patrulleru d'altura de l'Armada Española, Centinela, que llega'l día 14, pero que va podrá visitase al otru día de 10:00 a 13:00 y de 15:00 a 17:00 hores.

Actos institucionales d'homenaxe

Xunto cola visita del patrulleru Centinela, el vienres 15 tamién va haber n'Avilés eventos diferentes n'alcordanza de la figura del Adelantáu de La Florida. Na plaza España, a aprtir de les 11:30 hores, habrá un alcuentru d'autoridaes civiles y militares, asina como persones d'asociaciones que tán puxando y trabayando na celebración del V Centenariu.  

Dende la plaza España van dir hasta la ilesia de San Antonio de Padua (de los Padres Franciscanos, cai La Ferrería) pa visitar , a les 11:45 hores, el panteón onde tán los restos mortales de Pedro Menéndez.

Pa terminar, ta previsto qu'a les 12:00 hores empiece la ufrienda de flores na estatua del militar y marín avilesín que ta nel parque d'El Muelle, obra del escultor Manuel Garcí-González.

Les persones encargaes de pronunciar los discursos sedrá l'alcaldesa d'Avilés, Mariví Monteserín; la Cronista Oficial d'Avilés, Josefa Sanz Fuertes; y el Comandante Naval de Xixón, Carlos Orueta Lueje. Tamién van dir el rector de la Universidá d'Uviéu, Santago García Granda, representantes d'asociaciones rellacioanes coles Fuerces Armaes, asina como la tripulación del Centinela.

L'actu va terminar con un conciertu pequeñu de la Banda de Música d'Avilés, pa terminar tocando l'himnu nacional.

Emisiones de la Unión de Radioaficionaos Españoles

La Seición Comarcal de la Unión de Radioaficionaos Españoles va salir a les ondes de tol mundu pa informar sobre los actos del V Centenariu del Nacimientu de Pedro Menéndez. Pa ello, dende la Direición Xeneral de Telecomunicaciones dióse-yos un códigu específicu col que van poder radiar l'eventu del vienres y tamién na selmana siguiente. El códigu especial nesti casu va ser AN 1 PM, acrónimu d' Añu Pedro Menéndez.

  • © 2019 Fundación de Cultura. Conceyu d’Avilés. | Avisu llegal |